അത്യാധുനിക സാങ്കേതിക വിദ്യ ഉള്‍ക്കൊള്ളിച്ച് പുറത്തിറക്കുന്ന പുതിയ രണ്ടായിരം രൂപ നോട്ട് ലോക ചരിത്രത്തില്‍ തന്നെ ആദ്യം!
ഡല്‍ഹി : കള്ളപ്പണവും കള്ളനോട്ടും ഒരുമിച്ച് അവസാനിപ്പിക്കുക എന്ന മോദി സര്‍ക്കാരിന്‍റെ പുതിയ നടപടിയെ “തുഗ്ലക്ക് പരിഷ്കാരം” എന്ന് പലരും വിമര്‍ശിച്ചിരുന്നു. “പുതിയ നോട്ട് ഇറക്കിയാലും അതിന്‍റെ കള്ളനോട്ട് വീണ്ടും ഉണ്ടാക്കില്ലേ” എന്ന വിമര്‍ശകരുടെ ചോദ്യത്തിന് ചുട്ട മറുപടിയായിട്ടാണ് പുതിയ നോട്ടിന്‍റെ രൂപരേഖ പുറത്ത് വന്നിരിക്കുന്നത്.
അത്യാധുനിക നാനോ ജി.പി.എസ് സിസ്റ്റം ഖടിപ്പിച്ചവ ആണ് പുതിയ നോട്ടുകള്‍ എന്ന് ഉന്നത വൃത്തങ്ങളില്‍ നിന്നു നേരത്തെ അറിയാന്‍ സാധിച്ചിരുന്നു. ഇവ സാറ്റ് ലൈറ്റ് റിഫ്ലെക്ടര്‍ ആയി പ്രവര്‍ത്തിക്കുകയും തുടര്‍ന്ന് കറന്‍സികള്‍ ട്രാക്ക് ചെയ്യാനും സാധിക്കും. നിലവില്‍ ലഭ്യമായ വാര്‍ത്തകള്‍ പ്രകാരം പുതിയ നോട്ടുകളില്‍ എഫ്.എം റേഡിയോ, 12 മെഗാ പിക്സല്‍ ക്യാമറ, 200 ജി.ബി മെമ്മറി, 3 ബ്ലേഡ് ഷേവിംഗ് സെറ്റ് എന്നിവയും ഉള്‍പ്പെടുത്തിയിട്ടുണ്ട്. ഇഷ്ടമുള്ള പാട്ടുകള്‍ കേള്‍ക്കാന്‍ ഉള്ള ഓഡിയോ പോര്‍ട്ടുള്ള കറന്‍സികള്‍ പൂര്‍ണ്ണമായും സൌരോര്‍ജ്ജത്തില്‍ പ്രവര്‍ത്തിക്കുന്നതിനാല്‍ അന്തരീക്ഷ മലിനീകരണ വെല്ലുവിളി ഉയര്‍ത്തുന്നില്ല എന്നത് എടുത്ത് പറയേണ്ട സവിശേഷതയാണ്!
പുതിയ കറന്‍സികള്‍ ഉടന്‍ തന്നെ ബാങ്കുകളില്‍ എത്തി തുടങ്ങുമെന്ന് ബന്ധപ്പെട്ടെ വൃത്തങ്ങള്‍ അറിയിച്ചിട്ടുണ്ട്. പുതിയ നോട്ടിന്‍റെ വരവ് ആഗോള സാമ്പത്തിക രംഗം പിടിച്ച് കുലുക്കുമെന്നു റിപ്പോര്‍ട്ടുകള്‍ സൂചിപ്പിക്കുന്നു. ട്രമ്പിന്‍റെ വിജയത്തോടെ കൂപ്പ് കുത്തിയ വിപണി സൂചികകള്‍ ഉയര്‍ത്തെണീക്കാന്‍ പുതിയ ഇന്ത്യന്‍ കറന്‍സികള്‍ക്ക് കഴിഞ്ഞേക്കും എന്ന് വിദഗ്ദര്‍ ചൂണ്ടി കാണിക്കുന്നു!