“മന്ത്രി ജി .സുധാകരന് ഈ വര്‍ഷത്തെ ഓടക്കുഴല്‍ അവാര്‍ഡ്‌ ലഭിക്കുമോ? മന്ത്രിയുടെ കവിതകള്‍ ജനമനസ്സുകള്‍ കീഴടക്കുന്നു”

വൃത്തവും പ്രാസവും ആന്തരികജ്ഞാന വൈവിധ്യജീർണ്ണതയും ഒത്തു ചേർന്ന ജീ-കവിതകൾ അടുത്ത കൊല്ലം മുതൽ എസ്.എസ്.എ സിലബസിന്‍റെ ഭാഗമായി ഉൾപ്പെടുത്താൻ സർക്കാർ ആലോചിക്കുന്നുണ്ട്.

തിരുവനന്തപുരം : പൊതുമരാമത്തു മന്ത്രി ജി. സുധാകരനാണ് സോഷ്യൽ മീഡിയയിലെ താരം. മന്ത്രിസഭയാകെ തുഗ്ലക് പരിഷ്‌കാരങ്ങളുടെ പേരിൽ വിമർശനങ്ങൾ നേരിട്ട് സ്തബ്ധരായി നിൽക്കുമ്പോൾ ജി.സുധാകരൻ മാത്രം അതിൽ നിന്ന് വേറിട്ട്‌ നിൽക്കുന്നു. തന്‍റെ ഉത്തരാധുനിക കവിതകളിലൂടെയാണ് സുധാകരൻ വിമർശകരുടെ വായടപ്പിക്കുന്നത്. കവിത എന്ന കലാശാഖയെ രാഷട്രീയ പരിചയാക്കിയിരിക്കുകയാണ് പ്രിയ സഖാവ്!

ജീയുടെ കവിതകൾ സോഷ്യൽ മീഡിയയിൽ ചർച്ചയായതോടെ 2016-ലെ “ഓടക്കുഴൽ അവാർഡ്” അദ്ദേഹത്തിന് ലഭിച്ചേക്കാം എന്ന് നിരീക്ഷകർ ചൂണ്ടിക്കാട്ടുന്നു. കാലിക പ്രസക്തിയും കാവ്യഭംഗിയും ഒത്തുചേർന്ന  ഇത്തരം കവിതാ സൃഷ്ടികൾ വേറെ അടുത്ത കാലത്തൊന്നും ഉണ്ടായിട്ടില്ല എന്നതാണ് ജി സുധാകരന് അവാർഡിന് സാധ്യത കൂട്ടുന്നത്! വൃത്തവും പ്രാസവും ആന്തരികജ്ഞാന വൈവിധ്യജീർണ്ണതയും ഒത്തു ചേർന്ന ജി-കവിതകൾ അടുത്ത കൊല്ലം മുതൽ എസ്.എസ്.എ സിലബസിന്‍റെ ഭാഗമായി ഉൾപ്പെടുത്താൻ സർക്കാർ ആലോചിക്കുന്നുണ്ട്.

“എനിക്കുറങ്ങണം” എന്ന കവിതയാണ് നിലവിൽ സോഷ്യൽ മീഡിയയിൽ വൈറൽ ആയതെങ്കിലും, “പൂച്ചേ പൂച്ചേ” എന്ന ഉത്തരാധുനിക സൃഷ്ടിക്കാണ് ആരാകധർ ഏറെ. ജിയുടെ “ആരു നീ ഒബാമ?” എന്ന കവിത അന്താരാഷ്ട്ര തലത്തിൽ ചർച്ച ചെയ്യപ്പെട്ടിരുന്നു.കവിതയുടെ പ്രചാരം ആഗോളതലത്തില്‍ വര്‍ദ്ധിച്ചതോടെ ഒബാമ തന്‍റെ പല നിലപാടുകളും മയപ്പെടുത്താന്‍ നിര്‍ബന്ധിതനായിരുന്നു. “അമേരിക്കൻ പ്രസിഡണ്ട്‌ ബരാക്ക് ഒബാമക്കുള്ള താക്കീത് എന്നതിലുപരി മുതലാളിത്വ-ബൂർഷ്വ വ്യവസ്ഥിതിയെ വെല്ലുവിളിക്കുന്ന ഒന്നാണ് പ്രസ്തുത കവിത എന്ന് പ്രശസ്ത ചിന്തകൻ നോം ചോംസ്കി അഭിപ്രായപ്പെട്ടു. “കവിതകളെ, സുധാകരന് മുമ്പും പിമ്പും എന്ന് വിശേഷിപ്പിക്കുന്ന കാലം വിദൂരമല്ലെ”ന്നാണ് പ്രതിപക്ഷ നേതാവ് രമേശ് ചെന്നിത്തല പ്രതികരിച്ചത്!